វ៉ាស៊ីនតោន៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានកាន់មេក្រូប្រកាសប្រាប់ពលរដ្ឋខ្មែរដែលគាំទ្ររាជរដ្ឋាភិបាលកម្ពុជាពីមុខសណ្ឋាគារដែលសម្ដេចស្នាក់នៅ រសៀលថ្ងៃទី១១ ខែឧសភា ឆ្នាំ២០២២ ម៉ោងនៅអាមេរិក ឱ្យអ្នកទាំងអស់នោះអត់ធ្មត់កុំធ្វើការតបតនឹងការញុះញង់របស់ក្រុមប្រឆាំងដើម្បីរក្សា «សេចក្ដីថ្លៃថ្នូរ»។

ថ្លែងចំពោះមុខពលរដ្ឋដែលមកគាំទ្រជាង ៣០០នាក់ ដែលចំនួននេះត្រូវបានអាជ្ញាធរអាមេរិកកំណត់ដោយបារម្ភពីសុវត្ថិភាព សម្ដេចតេជោបានថ្លែងថា៖ «ខ្ញុំសុំផ្ដាំផ្ញើជូនបងប្អូនទាំងអស់ឱ្យមានការអត់ធ្មត់ចំពោះមុខការញុះញង់ការបង្កហេតុពីជនដែលមិនចូលចិត្តជាមួយខ្ញុំតែមកបំផ្លាញទឹកចិត្តបងប្អូននៅទីនេះ។ បើទោះបីជាគេញុះញង់ក៏ដោយយើងកុំធ្វើសកម្មភាពណាមួយតបតជាមួយគេ យើងត្រូវប្រកាន់នូវឥរិយាបថថ្លៃថ្នូរក្នុងនាមជាអ្នកគាំទ្រព្រះរាជាណាចក្រកម្ពុជា គាំទ្ររាជរដ្ឋាភិបាល ឬរហូតដល់គាំទ្រគណបក្សប្រជាជនកម្ពុជា។ យើងមកទីនេះគឺដើម្បីគាំទ្រខ្ញុំ គាំទ្ររាជរដ្ឋាភិបាលតែប៉ុណ្ណោះ យើងមិនតបតយើងមិនសំដៅប្រឆាំងជាមួយនឹងអ្នកណាដែលគេមិនចូលចិត្តយើងទេ! យើងមិនតបតជាមួយអ្នកបង្កហេតុទាំងនោះទេ។ សូមប្រាប់បងប្អូនដើម្បីជៀសវាងដល់ការឆ្លើយតបណាមួយដោយហិង្សា ហើយខុសនឹងច្បាប់នៅអាមេរិក»។

នៅម៉ោងប្រមាណ៥រសៀលនៅអាមេរិក សម្ដេចតេជោ ក៏នឹងជួបសំណេះសំណាលជាមួយពលរដ្ឋខ្មែរជាង ២០០០ពាន់នាក់ដែលរស់នៅអាមេរិក និងកាណាដាផងដែរ។

គួរឱ្យដឹងផងដែរថា សម្ដេចតេជោ បានធ្វើដំណើរពីកម្ពុជាទៅកាន់សហរដ្ឋអាមេរិកកាលពីថ្ងៃទី១០ ខែឧសភាកន្លងទៅ ដើម្បីចូលរួមនិងធ្វើជាសហប្រធាននៃកិច្ចប្រជុំកំពូលអាស៊ាន-អាមេរិកដែលនឹងប្រព្រឹត្តិទៅនៅថ្ងៃទី១១ និង១២ ខែឧសភា ខាងមុខ៕